இஸ்ரேலைப் பூர்வீகமாகக் கொண்ட ஹாலிவுட் நடிகை கல் கதோட் டுவிட்டரில் போர் குறித்து வெளியிட்ட பதிவால் பெரும் சர்ச்சை எழுந்துள்ளது.
பாலஸ்தின் மீதான இஸ்ரேலின் விரோதப் போக்கு உலகம் அறிந்ததே. பாலஸ்தீன் நாட்டின் பள்ளிக் கூடங்கள் உட்பட அனைத்து இடங்களிலும் இஸ்ரேல் தாக்குதல் நடத்தி உள்ளது. படிப்படியாக பாலஸ்தீனத்தின் பகுதிகளை இஸ்ரேல் தொடர்ந்து ஆக்கிரமித்தும் வருகிறது. சமீபத்தில் இரு நாடுகளும் மேற்கொண்ட தாக்குதல்களில் 6 இஸ்ரேலியர்களும், 65 பாலஸ்தீனியர்களும் கொல்லப்பட்டு உள்ளனர்.
இந்நிலையில் ஹாலிவுட் படங்களில் நடித்துவரும் நடிகையும், இஸ்ரேலிய மாடல் அழகியும், முன்னர் இரண்டு ஆண்டுகள் இஸ்ரேல் பாதுகாப்புப் படையில் பணியாற்றியவருமான கல் கதோட், இந்தப் போர் குறித்து டுவிட்டரில் நீண்ட பதிவொன்றைக் கடந்த மே 12 அன்று வெளியிட்டார். அதில்,
’எனது தாய்நாடா இஸ்ரேல் சுதந்திரமாக, பாதுகாப்பாக வாழ வேண்டும் என்பது என் விருப்பம். அதே நேரம் நமது அண்டை நாடுகளுக்கும் அப்படி வாழ உரிமை உண்டு. பாதிக்கப்பட்ட மக்களுக்காக நான் இறைவனை வேண்டுகிறேன். விரோதப் போக்கு முடிவடைய வேண்டும், இதற்கு தலைவர்கள் ஒரு தீர்வைக் காண வேண்டும் என்றும் நான் வேண்டிக் கொள்கிறேன்’ – என்று அவர் கூறி இருந்தார்.
இது டுவிட்டரில் கடும் விமர்சனங்களைப் பெற்றது. பாலஸ்தீன் நாட்டின் நிலங்களை இஸ்ரேல் முறைகேடாக அபகரிப்பதை ஒரு இரு தரப்புப் போர் போல கல் கதோட் சித்தரிக்க முயல்வதாகவும், அவருக்கு தனது தாய் நாடு செய்யும் தவறை சுட்டிக் காட்டும் தைரியம் இல்லை எனவும் டுவிட்டர்வாசிகள் விமர்சித்து வருகின்றனர். இதனால் அவர் கமெண்ட் ஆப்ஷனை நிறுத்தி வைக்கும் நிலை ஏற்பட்டு உள்ளது.
அரிதாக சிலர், ‘கல் கதோட் இரு தரப்பு அமைதிக்காக பிரார்த்தனை செய்கிறார். இதனை விமர்சனத்துக்கு உள்ளாக்க வேண்டாம்’ – என்றும் கூறி வருகின்றனர். மார்வல் நிறுவனத்தின் வொண்டர் வுமன் வரிசைப் படங்களில் நடித்ததால் புகழ் பெற்றவர் கல் கதோட் என்பது குறிப்பிடத் தக்கது.
– நமது நிருபர்