இந்தியாவில் பெரும் வரவேற்பைப் பெற்ற மனி ஹெய்ஸ்ட் வெப் தொடரின் அடுத்த சீசன் ஒளிபரப்பாகும் தேதி அறிவிக்கப்பட்டது.
கொரோனா முடக்கத்தால் வீட்டிற்குள் அடைந்து கிடந்தவர்களுக்கு மிகப்பெரிய பொழுதுபோக்காக அமைந்திருந்தவை வெப் தொடர்கள்தான். கொரோனா முடக்கத்தின் போது திரையரங்குகளும் திறக்கப்படாததால் மக்கள் பலரும் பழைய திரைப்படங்களையும், அமேசான், நெட்பிளிக்ஸ், ஹாட் ஸ்டார் போன்ற பல்வேறு ஓ.டி.டி. தளங்களையும் பார்வையிட்டனர். இதனால் இந்திய அளவில் ஓ.டி.டி. தளங்களில் வெப் தொடர்களைப் பார்ப்பவர்கள் எண்ணிக்கை தாறுமாறாக அதிகரித்தது.
இதில் அதிகம் பார்க்கப்பட்ட தொடர்நெட் பிளிக்ஸ்-சில் வெளியான மனி ஹெய்ஸ்ட். அடிப்படையில் இது ஒரு ஸ்பானிஷ் வெப் தொடர். அதிபுத்திசாலியான கொள்ளையன், ஒரு பெரிய வங்கியை கொள்ளையடிப்பதுதான் இதன் ஒருவரிக் கதை.
ஏற்கனவே பார்த்து சலித்த ஒருவரிக் கதைதான் என்றாலும், கதை சொல்லும் விதம், காட்சிக்கு காட்சி விறுவிறுப்பு, அடுத்து என்ன நடக்கும் என்ற ஆர்வம், த்ரில், எதிர்பாராத திருப்பங்கள் என்று பார்ப்பவர்களை எழவிடாமல் ஆச்சர்யம் அடைய வைத்தது மனி ஹெய்ஸ்ட்.
இந்த வெப் தொடரை சாமானிய மக்கள் மட்டுமல்ல பிரபலங்களும் ஆர்வமாக பார்த்தனர். பிரபல இந்தி நடிகர் ஆயுஷ்மான் குரானா தனது ட்விட்டர் பக்கத்தில் இந்த மாதிரியான படங்களில நடிக்க ஆசையாக இருப்பதாகவும், மனி ஹெய்ஸ்ட்-டில் அந்த புரபசர் கதாபாத்திரத்தில்தான் நடிக்க விரும்புவதாகவும் பதிவிட்டிருந்தார்.
இந்த வெப் தொடரைத் தமிழில் எடுத்தால் எந்த எந்த தமிழ் நடிகர்கள் பொருத்தமாக இருப்பார்கள்? – என்று தமிழ் திரைப்பட நடிகர்களின் புகைப்படங்களை காட்டி ஒரு இயக்குனரை கேட்டதற்கு, புரபசர் கதாபாத்திரத்திற்கு நடிகர் விஜய்யும், தமாயு கதாப்பாத்திரத்திற்கு நடிகர் மகேஷ் பாபுவும், மொஹதான் கதாப்பாத்திரத்திற்கு நடிகர் அஜீத்தும், பெர்லினாக ஷாருக்கானும், டென்வராக ரன்வீர்சிங்கும், சரியான தேர்வாக இருப்பார்கள் என்று அவர் கூறினார். இதுவும் சமூக வலைத்தளங்களில் வைரலானது.
இதுவரை மனி ஹெய்ஸ்ட் தொடரின் நான்கு சீசன்கள் எடுக்கப்பட்டு இருந்த நிலையில் கொரொனாவால் அடுத்த சீசன் தள்ளிப் போனது..
ஒரு புத்தகத்தில் கடைசி சில பக்கங்களுக்காக காத்திருப்பது போல் இந்த வெப் தொடரின் கடைசி சீசனுக்காக ரசிகர்கள் ஆவலோடு காத்திருந்த நிலையில், அவர்களை மகிழ்ச்சி அடைய வைக்கும் விதமாக வரும் ஜீலை 31 அன்று அடுத்த சீசன் வெளியிடப்படும் என்று மனி ஹெய்ஸ்ட் குழுவினர் தற்போது அதிகாரபூர்வமாக அறிவித்துள்ளனர். இது அந்தத் தொடரின் ரசிகர்களுக்கு பெரும் மகிழ்ச்சியை ஏற்படுத்தி உள்ளது.
சே.கஸ்தூரிபாய்