2006ஆம் ஆண்டில் பதிவிடப்பட்ட ஒரு டுவிட்டர் பதிவு 18 கோடி ரூபாய் மதிப்புக்கு சமீபத்தில் ஏலத்தில் விற்கப்பட்டு உள்ளது!.
கலைப் பொருட்கள், ஓவியங்கள், புகைப்படங்கள், ஆட்டோகிராப்புகள் ஆகியவற்றின் வரிசையில் இப்போது இணையப் பதிவுகளும் ஏலப் பொருட்களாகிவிட்டன.
வேல்யுபில்ஸ் என்ற நவீன ஏல நிறுவனமானது இணையத்தில் வெளியான ஒரு குறிப்பிட்ட பதிவின் டிஜிட்டல் சான்றிதழை எழுத்து அதை உருவாக்கிய நபரைக் கொண்டே சரிபார்த்து, உருவாக்கியவரின் கையெழுத்துடன் விற்கிறது. இதற்கு என்.எஃப்.டி. (NFD – Non-Fungible Token) என்று பெயரும் சூட்டியுள்ளது. இதன் மூலம் ஒரு இணையப் பதிவு சான்றிதழ் வடிவிலான கலைப் பொருளாகின்றது.
டுவிட்டர் நிறுவனத்தின் தலைமை செயல் அதிகாரி ஜாக் டார்சி கடந்த 2006ஆம் ஆண்டில் முதன்முதலாக வெளியிட்ட டுவிட்டர் பதிவை சமீபத்தில் இந்த நிறுவனம் டிஜிட்டல் சான்றிதழாக மாற்றி இணையத்தில் விற்றது. இந்த சான்றிதழ் 29 லட்சம் அமெரிக்க டாலர்களுக்கு அதாவது இந்திய மதிப்பில் சுமார் 18 கோடிக்கு ஏலம் போனது. இதனால் உலகிலேயே அதிக விலைக்கு விற்கப்பட்ட டுவிட்டர் பதிவு என்ற சாதனையையும் அது படைத்தது.
அதன்பின்னர் இந்த ஏலத்தின் மூலம் கிடைத்த தொகையை வேல்யுபில்ஸ் நிறுவனம் பிட்காயின்களாக மாற்றி ஒரு தொண்டு நிறுவனத்துக்கு நன்கொடையாகக் கொடுத்ததும் குறிப்பிடத் தக்கது!. டிஜிட்டல் யுகத்தின் புதிய பரிமாணத்தைக் காட்டும் சம்பவம் என்று இதை இணையவாசிகள் பகிர்ந்து வருகின்றனர்.
நமது நிருபர்.