ஜெய்ப்பூர்:
5 வயது சிறுமிக்கு பாலியல் வன்கொடுமை இழைத்த 20 வயது இளைஞருக்கு போக்சோ நீதிமன்றம் தூக்கு தண்டனை விதித்தது.
இராஜஸ்தான் மாநிலத்தில் உள்ள ஜூன்ஜூனு கிராமத்தைச் சேர்ந்த 20 வயது இளைஞர் ஒருவர் கடந்த பிப்ரவரி மாதம் 19ஆம் தேதி 5 வயது சிறுமிக்கு பாலியல் வன்கொடுமை இழைத்ததற்காக கைது செய்யப்பட்டார். நாட்டையே அதிர்ச்சிக்கு உள்ளாக்கிய இந்த வழக்கின் விசாரணை மாவட்ட போக்சோ நீதிமன்றத்தில் நடைபெற்று வந்தது.
காவல்துறை தரப்பில் குற்றவாளிக்கு எதிரான சாட்சியங்கள் சந்தேகத்திற்கு இடமில்லாத வகையில் அளிக்கப்பட்டன. குற்றம் சாட்டப்பட்ட இளைஞரும் எவ்வித குற்ற உணர்ச்சியும் இல்லாதவராக வழக்கை எதிர்கொண்டார்.
வழக்கின் 26ஆவது நாளிலேயே விசாரணைகள் அனைத்தும் முடிவுற்ற நிலையில், 27ஆம் நாளில் குற்றவாளிக்கு மரண தண்டனை வழங்கி நீதிபதி தீர்ப்பளித்தார்.
அந்தத் தீர்ப்பில், இந்தக் கொடூரமான குற்றத்தில் ஈடுபட்ட குற்றவாளியின் கண்களில் சிறுது கூட வருத்தம் காணப்படவில்லை. அவர் வருந்தி இருந்தால் தண்டனை வேறு விதமாக இருந்திருக்கும் – என்றே நீதிபதி குறிப்பிட்டு உள்ளார். இந்த வழக்கில் வேகமாக செயல்பட்டு வலுவான ஆதாரங்களை அளித்த காவல்துறைக்கும் நீதிபதி பாராட்டுகளைத் தெரிவித்து உள்ளார்.