அமெரிக்கா
நமது நிருபர்.
உலக அளவில் கொரோனாவின் பாதிப்பும் பலி எண்ணிக்கையும் அதிகம் உள்ள நாடாக அமெரிக்கா உள்ளது. தொடக்கம் முதலே கொரோனா அமெரிக்காவில் கடும் பாதிப்புகளை ஏற்படுத்தி வருவதாலும், கொரோனா பரவலைக் கட்டுப்படுத்த இயலாத காரணத்தாலும் அமெரிக்க மக்கள் வேலை இழப்புகளையும் பொருளாதார பாதிப்புகளையும் சந்தித்து வருகின்றனர்.
இந்நிலையில், கடந்த ஜனவரியில் ஜோ பைடன் தலைமையிலான புதிய அரசு அமெரிக்காவில் ஆட்சிக்கு வந்தது. ’கொரோனாவில் இருந்து நாட்டை மீட்டெடுப்போம், பாதிக்கப்பட்டவர்களுக்கு நிவாரண நிதி அளிப்போம்’ – என்று தேர்தலின் போது வாக்குறுதி கொடுத்திருந்த ஜோ பைடன், அதற்காக ’கொரோனா நிவாரண நிதித் திட்டம்’ என்ற பிரம்மாண்ட மக்கள் நலத் திட்டத்தை அறிவித்தார்.
அமெரிக்காவில் உள்ள 85 சதவிகிதம் குடும்பத்தினருக்கு இந்த மாதத்திற்குள் தலா ஆயிரத்து நானூறு டாலர்கள் தொகையை அளிப்பதே இந்தத் திட்டத்தின் முக்கியப் பகுதி ஆகும். இதற்காக ஒரு லட்சத்து தொன்னூறாயிரம் கோடி அமெரிக்க டாலர்களை ஜோ பைடன் அரசு ஒதுக்கியது.
இந்த கொரோனா நிவாரண நிதிக்கான மசோதா மார்ச் 10ஆம் தேதி அமெரிக்க நாடாளுமன்றமான செனட்டில் நிறைவேறி உள்ளது. இதனால் அமெரிக்கக் குடும்பங்கள் விரைவில் சுமார் 1 லட்சம் ரூபாய் மதிப்பிலான நிவாரண நிதியைப் பெற உள்ளன.
இந்தப் பணிகளோடு, அமெரிக்காவில் கொரோனா தடுப்பூசிகளின் தயாரிப்பை அதிகரித்து, அதன் மூலம் கொரோனாவைக் கட்டுப்படுத்தவும் அமெரிக்க அரசு திட்டம் வகுத்து உள்ளது.
