பிக் பாஸ் நல்லாத்தான் போயிட்டு இருக்கா?-ன்னு பலருக்கும் தோன்றிய கேள்வியை கண்டு, அதற்கு பதில் சொல்லும் விதமாக ‘இந்த வருடமும் பிக்பாஸ் நல்லாத்தான் போயிட்டு இருக்கு’ன்னு நிகழ்ச்சியை ஆரம்பித்தார் கமல்.
அகம் டிவி வழியாக வீட்டிற்கு சென்ற கமல், பிக் பாஸ் முந்தின சீசனை பார்த்துள்ளீர்களா? என்ற கேள்வியோடு உரையாடலை ஆரம்பித்தார். பலரும் பல பதில்கள் கூற, முழு பூசணிக்காயை மறைக்கும் விதமாக ‘நான் பார்த்ததே இல்லை’ என்று கூறினார் அபிஷேக். அவர் வீடியோ வைரல் ஆனது அவருக்கு தெரியாது இல்லையா… பாவம்…
அடுத்து யார் யாரோட கதைகள் உங்களுக்கு பிடித்தது, எந்தக் கதைகளில் ஈடுபாடில்லை என்று கேட்டு கொஞ்சம் நேரத்தை ஓட்டினார் கமல். பின்னர் நாமினேஷனில் உள்ள ஐவரை ஒன்றாக உட்கார வைத்து, ஒவ்வொருத்தராகக் காப்பாற்றினார். இறுதியில் ஐக்கி மற்றும் நாடியா இருக்க, ஐக்கியை காப்பாற்றினார் பிக் பாஸ். இதனால் இந்த வாரம் வெளியேறியது நாடியா சாங்.
நாடியா சாங் பற்றி தற்போது நிறைய டிக் டாக் வீடியோக்கள் வந்துள்ளன, அதாவது மலேசியா வாழ் மக்கள் நிறைய பேர் நாடியா சாங்கிற்கு எதிராக பேசி வீடியோ வெளியிட்டிருந்தனர். அதன் எதிரொலியாக இந்த வெளியேற்றம் இருந்திருக்குமோ? என்றும் தோன்றுகிறது. இருந்தாலும் வீட்டில் அவர் பெரிதாக எதிலும் ஈடுபாடு இல்லாமல்தான் இருந்தார் என்றும் பார்த்த நமக்கே தெரிகிறது. இதை விட பிக் பாஸ்க்கு இந்த நாடியாவ வெச்சு கண்டெண்ட் வாங்க முடியாது -ன்னும் தோணுச்சோ என்னவோ…
- சே.கஸ்தூரிபாய்
