வாய்ஸ் மெசேஜ் சேவையை இன்னும் மேம்படுத்தும் புதிய அப்டேட்டை வாட்ஸப் நிறுவனம் உருவாக்கி உள்ளது.
நேரில் பேசுவதைவிட எழுத்துப்பூர்வமாக உரையாடுவது சில நேரங்களில் நல்லது. குறிப்பாக லொடலொட என்று பேசும் மனிதர்களிடம் மணிக் கணக்கில் பேசினாலும் வெளிவராத தகவல்கள் அவர்களிடம் வாட்ஸப்பிலோ மெசேஞ்சரிலோ எழுத்துப்பூர்வமாக உரையாடினால் கிடைத்துவிடும். இதன் காரணம் தட்டச்சு செய்வதில் மனிதர்களுக்கு ஏற்படும் அலுப்புதான்.
ஆனால், வாட்ஸப் செயலியில் வாய்ஸ் மெசேஜ் தொழில்நுட்பம் வந்த உடன், லொடலொட என்று பேசுவபர்களுக்கு இது ஒரு வரப் பிரசாதமாகிவிட்டது. அதே சமயம் அவர்களின் எதிர் முனையில் உள்ளவர்களுக்கு இது பெரிய தலைவலியாகவும் உள்ளது. அவ்வளவையும் பொறுமையாகக் கேட்க வேண்டிய நிர்பந்தமும், நேர விரயமும் இதனால் ஏற்படுகின்றன.
இதனை மனதில் வைத்து வாய்ஸ் மெசேஜ் சேவையில் ஒரு புதிய வசதியை வாட்ஸப் உருவாக்கி உள்ளது. வீடியோ மற்றும் ஆடியோ பிளேயர்களில் நாம் பாஸ்டு பார்வர்டு பொத்தானைப் பயன்படுத்தி ஒரு ஒலிப்பதிவை அதிக வேகத்தில் கேட்க முடியும், அதே அம்சத்தை வாய்ஸ் மெசெஜ்களிலும் வாட்ஸப் நிறுவனம் உருவாக்கி உள்ளது.
இதனால் வாய்ஸ் மெசேஜ்களை எதிர்வரும் காலங்களில் 50% கூடுதல் வேகத்தில் அல்லது இன்னொரு மடங்கு கூடுதல் வேகத்தில் கேட்க முடியும். இப்படிக் கேட்கும்போதும் மெச்சேஜ்ஜில் உள்ள செய்தியைப் புரிந்து கொள்ள இயலும். எனவே இந்தப் புதிய வசதி பெரும் வரவேற்பைப் பெறும் என எதிர்பார்க்கப்படுகின்றது. தற்போது இந்த வசதி சோதனை ஓட்ட நிலையில் உள்ளது.
– நமது நிருபர்.