தமிழகத்தில் பிறப்பிக்கப்பட்டுள்ள ஊரடங்கு ஜூலை 31ம் தேதியுடன் முடிவடைய உள்ள நிலையில், ஊரடங்கை நீட்டிப்பது குறித்து அதிகாரிகளுடன் முதலமைச்சர் மு.க.ஸ்டாலின் இன்று ஆலோசனை மேற்கொள்கிறார்.
தமிழகத்தில் கொரோனா பாதிப்பு படிப்படியாக குறைந்து வருவதால், பிறப்பிக்கப்பட்டுள்ள முழு ஊரடங்கில் தளர்வுகள் அறிவிக்கப்பட்டு ஜுலை 31 ஆம் தேதி வரை ஊரடங்கு நீட்டிக்கப்பட்டது.
அதன்படி தளர்வுகளுடன் கூடிய ஊரடங்கு நாளையுடன் முடிவடைய உள்ள நிலையில், ஊரடங்கு நீட்டிப்பது தொடர்பாகவும், அடுத்தக்கட்ட நடவடிக்கைகளை மேற்கொள்வது தொடர்பாகவும்,சென்னை தலைமைச் செயலகத்தில் சுகாதாரத்துறை அதிகாரிகள் மற்றும் அரசின் உயர் அதிகாரிகளுடன் முதலமைச்சர் மு.க.ஸ்டாலின் இன்று ஆலோசனை மேற்கொள்கிறார்.
இந்த ஆலோசனைக்கு பிறகு மேலும் சில தளர்வுகள் அறிவிக்கப்படலாம் என எதிர்ப்பார்க்கப்படுகிறது. அத்துடன் தமிழகத்தில் பள்ளி கல்லூரிகள் திறப்பதற்கான முக்கிய அறிவிப்பும் இன்று வெளியாகும் என எதிர்பார்க்கப்படுகிறது.