புதுடெல்லி.
கடந்த 2 ஆண்டுகளாக 2000 ரூபாய் வங்கித்தாள்கள் அச்சிடப்படவில்லை என மத்திய அமைச்சர் நாடாளுமன்றத்தில் தகவல்.
பணமதிப்பு நீக்கத்திற்குப் பின்னர்தான் சுதந்திர இந்தியாவில் முதன்முறையாக 2000 ரூபாய் வங்கித்தாள்கள் அச்சிடப்பட்டன. தொடக்கத்தில் அதிகமாக மக்களிடம் புழங்கிய இந்த 2000 ரூபாய் வங்கித்தாள்களை சமீப காலங்களில் காணவே முடியவில்லை.
இதனால் நாடாளுமன்றத்தின் மக்களவையில் ‘2000 ரூபாய் வங்கித்தாள்கள் மீண்டும் அச்சடிக்கப்படுகின்றவா?’ என்ற கேள்வி முன்வைக்கப்பட, இந்தக் கேள்விக்கு மத்திய நிதித்துறை இணையமைச்சர் அனுராக் தாக்கூர் எழுத்துப்பூர்வமான விரிவான பதிலை அளித்தார்.
அதில், கடந்த 2016-17ஆம் ஆண்டில் 354 கோடியே 39 லட்சம் 2000 ரூபாய் வங்கித்தாள்கள் அச்சடிக்கப்பட்டதாகவும், 2017-18ஆம் ஆண்டில் அது 11 கோடியே 15 லட்சமாகக் குறைக்கப்பட்டதாகவும் , 2018-19ல் அந்த எண்ணிக்கை இன்னும் குறைகப்பட்டு 4 கோடியே 666 லட்சம் 2000 ரூபாய் வங்கித்தாள்கள் மட்டுமே அச்சடிக்கப்பட்டதாகவும் குறிப்பிடப்பட்டு உள்ளது. மேலும் 2019 ஏப்ரல் மாதத்திற்குப் பின்னர் கடந்த 2 ஆண்டுகளாக 2000 ரூபாய் பணத்தாள்கள் அச்சிடப்படவே இல்லை – என்றும் கூறப்பட்டு உள்ளது.
நிதியமைச்சகத்தின் இந்த பதிலானது, ’2000 ரூபாய் வங்கித்தாள்களின் வருகை எதிர்பார்க்கப்பட்ட பலனை அளிக்கவில்லை’ என்று பொருளாதார நிபுணர்கள் பலரும் கூறிய குற்றச்சாட்டை ஏற்பதாகவே அமைந்துள்ளது.
நமது நிருபர்.