நாடு முழுவதும் கொரோனாவின் தாக்கம் அதிகரித்து வரும் நிலையில் ஐசிஎம்ஆர் எனப்படும் இந்திய மருத்துவ கவுன்சில் கொரோனாவின் முதல் மற்றும் இரண்டாம் அலைகளுக்கு நடுவே உள்ள வேறுபாடுகள் குறித்து அறிக்கை வெளியிட்டுள்ளது.
கடந்த ஆண்டு கொரோனாவின் முதல் அலையின் போது அடுத்தடுத்து கொரோனாவின் புதிய அறிகுறிகள் கண்டுபிடிக்கப்பட்டன. வாசனையை உணர முடியாமல் போவது, தலைவலி, தொடர் இருமல், மூட்டு வலி ,தொண்டை வலி, தசை வலி, உடல் அசதி போன்ற அறிகுறிகள் பரவலாக ஏற்பட்டன. அயல்நாடுகளில் உடலில் சிகப்புப் புள்ளிகள் தோன்றுவது உள்ளிட்ட இன்னும் சில அறிகுறிகள் கண்டுபிடிக்கப்பட்டன.
ஆனால் இப்படிப்பட்ட அறிகுறிகள் எதுவும் இரண்டாவது அலையில் அதிகம் வெளிப்படவில்லை என்கிறது இந்திய மருத்துவ கவுன்சிலின் அறிக்கை. அதே சமயம் கொரோனா பாதிக்கப்பட்டு சிகிச்சையில் உள்ள நபர்களில் அதிக எண்ணிக்கையிலான நபர்களுக்கு மூச்சுத் திணறல் ஏற்பட்டு உள்ளது. இதனால்தான் முன்னெப்போதும் இல்லாத அளவுக்கு ஆக்சிஜன் சிலிண்டர் தட்டுப்பாடு ஏற்பட்டு உள்ளது என்கிறது அறிக்கை.
மூச்சுத் திணறலால் கொரோனாவின் இரண்டாவது அலை முதல் அலையைவிட தீவிரமாக இருப்பது போல தோன்றினாலும், இரண்டாவது அலைக்கும் முதல் அலைக்கும் நடுவில் அதிக வேறுபாடுகள் இல்லை. அதீத உயிர் இழப்புகளையும் இரண்டாவது அலை ஏற்படுத்தவில்லை. எனவே இரண்டாவது அலை அதிக தீவிரத்தன்மையோடு இல்லை என்கிறது இந்திய மருத்துவ கவுன்சிலின் அறிக்கை.
கொரோனா வைரஸ் வகைகளையும் அதன் அறிகுறிகளையும்போல, அதன் தாக்கங்களும் மாறுபடக் கூடியது என்பதால் கொரோனா விவகாரத்தில் மக்கள் ஒருபோதும் முன்னெச்சரிக்கையைக் கைவிடாமல் இருப்பது நல்லது.
- பிரியா வேலு.