வரலாற்றில் முதன்முறையாக இந்தியாவில் ஒரே நாளில் 1 லட்சத்திற்கும் மேற்பட்டோருக்கு கொரோனா உறுதி செய்யப்பட்டு உள்ளது!.
நேற்று ஒருநாளில் மட்டும் இந்தியாவில் 1,03,558 பேருக்கு கொரோனா உறுதி செய்யப்பட்டு உள்ளது. இந்தியாவில் கொரோனா பாதிப்பு ஒரே நாளில் ஒருலட்சத்தைக் கடப்பது இதுவே முதன்முறை ஆகும். கடந்த ஆண்டு செப்டம்பர் மாதத்தின் சில நாட்களில் 97,000 பேருக்கு கொரோனா பாதிப்பு கண்டறியப்பட்டதே முந்தைய உச்சபட்ச அளவாக இருந்தது.
மேலும் நேற்றைய ஒருநாளில் அதிகம் கொரோனா பரவலை சந்தித்த நாடுகளின் பட்டியலில் இந்தியா முதல் இடத்தில் உள்ளது. ஒட்டுமொத்தமாக அதிக கொரோனா பாதிப்பு காணப்படும் நாடுகளில் இந்தியா மூன்றாம் இடத்தில் உள்ளது. மேலும் இந்தியாவில் நேற்று ஒரே நாளில் கொரோனாவுக்கு 478 பேர் பலியாகி உள்ளனர்.
நாட்டிலேயே கொரோனா பரவல் அதிகம் உள்ள மாநிலமாக மகாராஷ்டிரம் உள்ளது. அங்கு நேற்று ஒரே நாளில் மட்டும் 57,074 நபர்களுக்கு கொரோனா தொற்று உறுதி செய்யப்பட்டது. மும்பை நகரத்தில் மட்டும் 11,163 பேர்கள் கொரோனாவுக்கு இலக்காகி உள்ளனர். தமிழ்நாட்டிலும் அன்றாட கொரோனா பாதிப்பு 500, 1000 எனத் தொடர்ந்து உயர்ந்து தற்போது 3500 என்ற அளவை எட்டியுள்ளது.
- நமது நிருபர்